من ساری

       قوپ قورو چول

سن ماوی

       بیر دنیز تک

گل قووشاق ایکیمیز

                  یام یاشیل دونیا اولاق

        نه ایستی بیلیر

        نه سویوق

       نه سئوگی بیلیر

       نه آجیق

                       تکجه اوزون سئودیره بیلیر

                                                                   سنین اوره گین

سهندین زیروه سینده کی قارلارا بنزه ییر

        جانیمین ایستیسین آلیر

        جانیما چوغون سالیر

                                                                 سنین باخیشلارین

یایدا یئدیییم دوندورمایا بنزه ییر

         دوداقلاریمی دوندورور

         شیرینده چالمیر

                                                               سنین دوداقلارین

سن منیم         

داشا بنزر

بوزا دونموش

آجی تاملی

سئوگولومسن

ایستکلیم

گئتدین

گئتدیکجه ایزلرین قالدی قار اوستده

قارداکی ایزلرین گئدرگین اولدو

منده کی ایزلرین قالارقین

         کئچمیشلرین دفینه سی

تام کئچمیشلری دفن ائدیرم اوزومده

تام پیس کئچمیشلری

پیس آداملاری

      پیس٬یاخشی ایزلریله

بیر یئنی گلجک

      بیر یئنی آداملار

یاراداجام اوزومدن

تام یاخشیلیقلار یارادانی اولاجام

یاخشی آداملار

      یاخشی٬ یاخشی عمللرله

تام خوش گلجک یاراداجام

بیر یئنی گلجک

     بیر یئنی آداملار